واخد بالك 2 ؟؟؟ حاجة تقرف
- الإخوان المسلمين كان لهم دور في حملة التوقيع على المطالب السبعة للجمعية الوطنية للتغيير وفي نفس الوقت هايدخلوا الإنتخابات .... حاجة تكسف
- كيلو الطماطم ب 9 جنيه , والفاصوليا ب 20 جنيه , واللحمة ب 65 جنيه ....... حاجة تجوع
- منتخب مصر اتغلب من النيبجر , بس يا خسارة جنوب أفريقيا اتعادلت , عارف لو كانت جنوب أفريقيا كسبت كان الوضع السياسي ممكن يتغير شوية كل الظروف بتلعب في صالحهم حتى تصفيات كاس الأمم .... حاجة تحبط
- يا سلام لو كل مشاكلنا العربية تتحل بالسهولة اللي اتحلت بيها مشكلة مشجعي نادي الترجي التونسي بعد حوار لم يستمر لثواني بين رئيسي الدولتين المصري والتونسي , تصدق فعلا أفرجوا عنهم بالرغم من إن محكوم عليهم بالحبس 15 يوم , فعلا مصر دولة بتحترم القضاء .... حاجة تجيب الشلل
- العصفورة قالت لي إن اللي اتحكم عليه قبل كدة بالإعدام لارتكابه جريمة قتل , وبعد كدة اتحكم عليه ب 15 سنة سجن بس , هايفرج عنه بعد فترة معينة افراجا صحيا نظرا لحالتة المتدهورة ..... بصراحة العصفورة دي بتستهبل ... مش معقولة طبعا .... حاجة تقلق
- بيقولوا مصر اختارت ( جمبري ) وانا مصري وبحب مصر ومش هاختار عمري الجمبري ولا بحبه ولا هاحبه ... ده حتى ريحته فايحة وزفرة جدا..... في حد يختار حاجة بايتة بقالها عشر سنين؟؟؟؟ حاجة تقرف
- الإخوان كانوا مشغولين بمسلسل ( الجماعة ) ودلوقتي مشغولين بالإنتخابات
- السلفيين مشغولين بمشكلة الشيخ ( محمد حسان ) حفظه الله بخصوص موضوع الأثار , وموضوع المباهلات بين أهل السنة والجماعة والشيعة , وموضوع مشاكلنا مع الكنيسة القبطية المصرية , نفسي ننشغل يا جماعة بموضوع(الجمبري ).... اشمعنى احنا يعني ماهو كل الناس مشغولة بيه ؟ ليه كدة يا مشايخنا ؟؟ والله العظيم زعلان منكم جدا سامحكم الله .... كان نفسي أعرف بجد إيه رأي مشايخنا في موضوع (الجمبري) أروح لمين يعني ؟ ..................... حاجة تحسر
محمود علي ... في 9 / أكتوبر / 2010
ليست هناك تعليقات:
إرسال تعليق